/
Жаңалықтар /
«Кітап оқитын ұлт» – рухани кемелдікке бастар жол!

«Кітап оқитын ұлт» – рухани кемелдікке бастар жол!

Бүгін «Кітап оқитын ұлт» республикалық кітап оқу марафоны аясында «Мен оқыған кітап» тақырыбында Shakarim High School мектебінің 10-сынып оқушыларымен қазақтың ұлы ойшылы, хакім Абайдың қара сөздеріне арналған мазмұнды әдеби-танымдық талқылау өтті.

Кездесу барысында Абайдың 7, 19 және 31-қара сөздері негізге алынып, адам жанының тәрбиесі, білімге құштарлық, естігенді есте сақтау, ақыл мен қайратты дамыту, естіген-білгенді ұмытпай, көңілге тоқудың маңызы туралы ой қозғалды.

Оқушылар ұлы ақынның терең тағылымына үңіліп, қара сөздердің бүгінгі өмірмен байланысын талқылады. Абай көтерген адамгершілік, білім, сана мен өзін-өзі тәрбиелеу мәселелері жас ұрпақтың ойына ой қосып, рухани дүниесін байытуға бағыт берді.

Абайдың қара сөздері – уақыт өткен сайын құндылығы арта түсетін өмірлік өсиет, адамдықтың өлшемі. Кітап оқу – тек білім алу емес, өзіңді тану, ойыңды дамыту, өмірге тереңірек қарау.

📖 «Кітап оқитын ұлт – ойлы ұлт, рухани бай ұлт!»

Осындай тағылымды кездесулер жас ұрпақтың кітапқа деген қызығушылығын арттырып, ұлттық руханиятқа құрметін нығайта түседі.

Жаңа кітаптар